AZMA YA KILIMOKWANZA YAONGEZA KASI YA MABADILIKO YA SEKTA KILIMO NCHINI

AZMA YA KILIMOKWANZA YAONGEZA KASI YA MABADILIKO YA SEKTA KILIMO NCHINI

Na Lydia Churi, MAELEZO-Dodoma

Serikali imesema mafanikio yaliyotokana na azma ya kilimo kwanza yamesaidia kuongeza kasi ya mabadiliko ya ukuaji katika sekta ya kilimo nchini.

Akijibu swali Bungeni mjini Dodoma leo, Naibu Waziri wa Kilimo, Chakula na Ushirika Adam Malima alisema mafanikio ya kilimo kwanza ni pamoja na kuongezeka kwa eneo linalolimwa kutoka hekta 264,388 mwaka 2006/2007 hadi kufikia hekta 345,690 mwaka 2010/2011.

Alisema kuongezeka kwa matumizi ya pembejeo za kilimo kutokana na mpango wa ruzuku, mbolea kutoka tani 73,000 mwaka 2007/2008 hadi tani 200,000 mwaka 2011/2012, pamoja na mbegu bora kutoka tani  11,056 mwaka 2007/2008 hadi tani 28,612 mwaka 2011/2012.

Aidha, aliyataja mafanikio mengine kuwa ni kuongezeka kwa maafisa ugani  kutoka 3,000 mwaka 2006/2007 hadi kufikia 7,974 mwaka 2012, ujenzi wa vituo 131 vya rasilimali vya kata pamoja na kuongezeka kwa matumizi ya zana bora za kilimo hadi kufikia matreka makubwa 8,466 na madogo 4,571 mwaka 2011.

Naibu Waziri huyo alisema licha ya kuwepo kwa mafanikio hayo, Kilimo kwanza kinakabiliwa na changamoto kama vile tija ndogo, ukosefu wa masoko ya uhakika, ukame na mabadiliko ya tabianchi, miundombinu duni ya barabara, reli na upatikanaji wa nishati ya umeme wa uhakika vijijini.

Alizitaja changamoto nyingine kuwa ni pamoja na upatikanaji wa ardhi iliyopimwa na kuwekewa miundombinu muhimu kama vile maji, umeme na barabara.

Alisema serikali itashughulikia changamoto hizo kupitia utekelezaji wa Mpango wa Maendeleo wa miaka mitano na Mpango wa Uwekezaji katika Usalama wa Chakula Tanzania ikiwa ni pamoja na kuimarisha usimamizi  na uwajibikaji kwa maafisa ugani.                  

 Akijibu swali lililoulizwa na Suzan Lyimo (Viti Maalum) aliyetaka kujua mkakati wa serikali wa kuwasaidia vijana kujishughulisha na kilimo badala ya kukimbilia mijini, Naibu waziri huyo alisema serikali inaitazama sekta ya kilimo kwa mapana yake hivyo inawahamasisha vijana kuanzisha vikundi vya uzalishaji ili wapatiwe mikopo kwa ajili ya kununua zana bora za kilimo na kujihusisha zaidi na kilimo ili kuongeza vipato vyao.